Ditaba tše botse ka Rushwin Dortley wa Kaizer Chiefs

Kaizer Chiefs e amogetše ditaba tše botse mabapi le moraloki wa bona “Rushwin Dortley” yo a batametšego go boa mabakeng a papadi.

Dortley o be a se a bapale go tloga ka Mopitlo morago ga go gobala lengwele, moo a ilego a dirwa opareitšene.

Go tloga ka nako yeo, o be a itlhakodiša ka thata gore a boele go bapala, molaodi wa gagwe o netefaditše gore o tla boa ka Pherekgong.

“O be a ka boela pejana, eupša lengwele le be le sa fole gabotse, a sa ekwa bohloko bjo bonyane,” go boletše molaodi wa gagwe.

O hlalositše gape gore Dortley o ile a bapala a sa phele gabotse pele a dirwa opareitšene ngwageng o fetilego.

“Re be re lebeletše gore a ka boa ka Diphalane, eupša o be a sa fola ka botlalo” arealo molaodi.

Pele a gobala, Dortley e be e le mongwe wa baraloki ba bohlokwa go Kaizer Chiefs le go sehlopha sa setšhaba, Bafana Bafana.