Moraloki Bushiri o hlokofetše ka morago ga kotsi ya koloi
Moraloki wa kgwele ya maoto ya Zimbabwe “Frankson Bushiri” o hlokofetše ka morago ga kotsi ya koloi.
Go kwagala gore kotsi ye e diragetše toropong ya Gweru ka letšatši la Lamorena.
Bushiri (35) e be e le mosireletši wa sehlopha sa Sheasham Football Club seo se bapalang ka gare ga ZIFA Central Region Soccer League.
Sehlopha se netefaditše lehu la gagwe ka tsebišo ya semmušo ye e lokollotšwego ka letšatši la Lamorena.
Moraloki yo a hlomphegago o kile a bapalela sehlopha sa TelOne FC seo se ralokago ka Zimbabwe Premier Soccer League.
Gape a feta le dihlopha tše mmalwa tša maemo a fase nageng ya gabo ya Zimbabwe.
Go ya ka dipego, Bushiri o lahlegetšwe ke taolo ya koloi ya gagwe gomme ya thulana le sehlare.
Sheasham FC e bontšhitše manyami a magolo ka go lahlegelwa ke moraloki wa yona.
“Ka manyami a magolo re amogetše ditaba tša go hlokofala Bushiri, yo a re tlogetšego mesong” gwa realo sehlopha.
Ditaba tša lehu la Bushiri di amogetšwe ka manyami mo setšhabeng sa kgwele ya maoto kua nageng ya Zimbabwe.
