Sono: “Vincent Tseka o swanetšwe go rakwa”

Moetapele wa Jomo Cosmos “Jomo Sono” o boletše ka bohloko bjo bo bakilwego ke mosepediši wa sehlopha sa Bafana Bafana, Vincent Tseka.

Ka lebaka la phošo ye e batametšego go senya maitemogelo a Bafana Bafana go tsena papadi ya lefase ya 2026.

Sono o boletše gore Tseka o swanetše go swarwa ka thata gomme a fedišwe mošomong wa gagwe.

“Go na le monkgo o mobe o tšwago ka gare ga Safa le lefapha la dipapadi leo le etelwago pele ke Gayton McKenzie” arealo Sono.

Gomme o gatelela taba ya gore go nale taba ya bomenetja ka lehlakoreng la dipapadi, ebile Tseka o swanetše go hlahlobjwa.

“McKenzie o dutše a tsena mo ditabeng tša batho ba bangwe, eupša o palelwa ke go bona gore Jordaan le Tseka a ba dire mošomo”.

Le ge go le bjalo, McKenzie o šetše a ngwadile lengwalo go Safa, a kgopela pego e hlakilego mabapi le seemo sa Teboho Mokoena.

Sono o tswele pele a nyatša McKenzie, a re o phela a le ditabeng, eupša o palelwa ke go rarolla ditaba tše bohlokwa mo Safa.