Go tlogela sehlopha ga Appollis go hlabile Mohafe pelo

Mohlahli wa Polokwane City, Phuti Mohafe, o boletše ka bohloko bjo bogolo sebapadi sa gagwe sa bohlokwa, Oswin Appollis se tlogetše sehlopha.

Mohafe o hlalositše gore Appollis e be e le karolo ye kgolo ya sehlopha sa gagwe mo mengwageng ye mebedi ya go feta.

“O tlogetše lešoba le legolo mo sehlopheng, Appollis ke moraloki wa goba le mafolofolo” arealo Mohafe.

Le ge a kwele bohloko, Mohafe o bontšhitše boikgantšo ka kamoo sebapadi seo se itšweletšego ka gona mo sehlopheng sa Pirates.

Appollis o thomile gabotse mo sehlopheng sa gagwe se seswa, ka fase ga mohlahli wa gagwe Abdeslam Ouaddou.

Go ya ka Mohafe, ba mo dumeletse ka gobane ba be ba nyaka gore a gole, le ge e be e se sephetho se bonolo.

Phuti Mohafe o bontšhitše bohloko le lerato ka mafoko a gagwe, gape o ikgantšha ka Appollis.

Le ge a kwele bohloko ka go tlogelwa ke Appollis, o bontšhitše lerato le dikeletšo tše botse go sebapadi sa gagwe sa pele.