Grobler o lebeletše katlego e kgolo le sehlopha sa Sekhukhune FC 

Bradley Allan Grobler, moraloki wa  maitemogelo wa kgwele ya maoto, o thomile bophelo bja gagwe le Sekhukhune United ka tsela ye botse kudu.

O korile di koulu tše pedi mo papading ya gagwe ya pele, gomme a thuša sehlopha go fenya TS Galaxy ka 3-2 papading ya MTN8.

Grobler o boletše gore o ikwa a le mo lefelong le le nepagetšego ka gobane Sekhukhune United ke sehlopha se se nago le pono yeo e swanago le ya gagwe.

“Ke šetše ke fihlelela tše dintši bophelong bja ka bja kgwele ya maoto, efela ke sa nyaka go phagamiša difoka” arealo Grobler.

Yena o nale mengwaga ye lesome (10) goba go feta a ralokela SuperSport United, efela o ile a se tlogela a ikgokaganya le Sekhukhune.

O okeditše ka gore pontšho ya gagwe ya mathomo e be e le ya bohlokwa kudu, kudu ka ge ngwaga wa 2024 o ile wa mmušetša morago.

“Ngwaga o fetilego ke ile ka gobala papading ya pele, gomme seo se ile sa mpušetša morago kudu” arealo Grobler.

Ka lebaka la mošomo wa gagwe o mobotse, Grobler o ile a thapiwa bjalo ka senatla sa Papadi (Man of the Match).