Kaze o roriša papadi ye botse ya Velebayi

Mohlahli wa Kaizer Chiefs “Cedric Kaze” o roriša Asanele Velebayi ka morago ga papadi ya gagwe ya mathomo ye e kgahlišago.

Velebayi o tsene go Amakhosi mmogo le Luke Baartman wa mengwaga ye 19 go tšwa Cape Town Spurs.

Bobedi bja bona bo ile bja swanela go leta monyetla wa bona ka baka la ditaba tša ditransfera tše di bego di sa fele gabotse.

Velebayi o filwe monyetla wa gagwe papading ya lesometee (11), gomme a tšea sebaka sa gagwe ka bokgoni.

Kaze o rile pontšho ye e tletšego boitshepo e bontšhitše lebaka leo ka lona sehlopha se dumelago bokgoni bja gagwe.

“Go na le tshepedišo ya go tsenya sebapadi se seswa mo sehlopheng, gomme ka dinako tše dingwe se tšea nako,” Kaze o hlalositše.

O okeditše ka go mo roriša ka maatla le maitekelo a gagwe a go hlasela, a re balatedi ba Chiefs ba ka letela go bona tše botse.

“E bile papadi ye botse ya mathomo, gomme re na le tshepo ya gore o tla dira kudu le go feta,” arealo Kaze.

Kaizer Chiefs e tla ba le tshepo ya gore kganya yeo Velebayi a e bontšhitšego e tla tšwela pele mo sehlopheng.