Mduduzi Shabalala o nyaka go hlohleletša Chiefs

Ka morago ga go bapala papadi ya gagwe ya mathomo le Bafana Bafana, Mduduzi Shabalala o ikopantše le Kaizer Chiefs kua Congo.

Moo ba tlago go lebana le sehlopha sa Simba ka Mošupologo wa CAF Confederation Cup kadi 20 tša kgwedi ya Diphalane.

Shabalala wa mengwaga e 21 o tsene papading ka motsotswana wa bo-88 nakong yeo Afrika Borwa e bego e fenya Rwanda ka 3-0.

“Ke toro ya sebapadi se sengwe le se sengwe go emela naga ya sona, ebile ke leboga monyetla”, arealo Shabalala.

Bjale moraloki wa Chiefs o nyaka go berekiša maatla ao a a hweditšego ka go bapalela Bafana Bafana le thuša sehlopha.

“Ruri ke papadi ye kgolo, ebile re swanetše go fenya gore re tsene leetong le le latelago la papadi” a tlaleletša ka gore yalo.

Papadi ya mathomo e tla bapalwa ka Mošupologo lepatlelong la TP Mazembe, mola papadi ya bobedi e tla bapalwa Dobsonville.